Мэ̄нн гуэйкэ оадзэ о̄ллмэгуэйм эйй е̄ль

Эйй лӣннче руэняс оадзкэ э̄ххтэ ва̄ресьт е̄лле. Нике̄ со̄нэнҍ эйй оаҏ-тэдтмэнч, никуэссь со̄нн нике̄з эйй ря̄ххтэдтма я эйй лӣйе ке̄з нюэссь тӯетҍ лыһкэ. Со̄нн та̄тэ поагэ ва̄ресьт уййтэ, штобэ
о̄ллмэгуэйм вӯййксэлнэ. Пугк та̄тэ ӣжесь-налла лыһкэ, югке сайе ӣжесь оадзэ ке̄бплэтҍ лӯшшьтэ. Ла̄мьпэсьт ӣжесь ка̄нҍц кӣзе, ӣжесь луз лыгктэдэ. Шӯрр ва̄птэгэтҍ оашшьтэй соннӭ, штобэ ка̄ннҍцэсь пугквесь уйнэч я куллтлэнч. Юррьтэль ре̄һкь я сыннӭсь оадзэ, ко̄ххт пукэтҍ э̄ллмантэсьт пе̄ссьтьэ.

О̄ллма я̄ллмушш чофта эйй мыльса соннӭ, я пукэтҍ оадзэтҍ се̄вьнэсь ва̄ресьт коадче ӣжесь гурре. Эфт о̄ллма ма̄йкэ, нымьп выеһтҍ, куаллмнэ тя̄һтэдэ, ня̄льянт э̄л па̄нӭтҍ я кэ̄нцэтҍ та̄һкад.
Тэнн шэ сыйтэсьт вуэммь нуэййт ӣле. Нуэййтъюшшэ со̄нн эйй ма̄һтэнч, пай вӣресь бубен
мӣлльтэ пляссэй, тэнн гуэйкэ, штэ ӣжесь бубен эйй лӣйе. Оадзэ воальтэ со̄н ӣжесь кӣдэ вуэла. Энҍтэ мугка па̄һкмуж, штобэ вӯййкэсьт соннӭ лушшэ, э оаз со̄н па̄ссьпаһт. Оаз ма̄тӭ е̄ннэ нуэййтъюшшэ я та̄тэ вӣресь кӣдэгуэйм ня̄льянт о̄ллма ма̄ййкэ, кӯ ля̄йй роаввса пӯдзэ чуэррьвэ я та̄л па̄ннӭ. Копче оаз пугк ӣжесь я̄кхэллъетҍ, эллькэнҍ юррьтэ, ко̄ххт нюэссь о̄ллмасьт сыйе пе̄сстэдтэ. Юррьтэнҍ, юррьтэнҍ я мугка па̄һкмуж лыһкенҍ, штэ тэдта олмэнч нюэзельт лыһк я эйй ма̄тҍ оадзэ бубен вӯлленҍ пляссъе. А нуэййт па̄һкмуж вуэла ӣжесь рыст ця̄кэсьт. Тэль сӣнэнҍ нимӣ эйй выййтма. Тэнна о̄ллма пӯррь са̄м тӯльйсэллэнҍ: со̄н эйй ве̄ррьвуд вӯййкъенҍ. Нуэййт ӣжесь рыст гуэйкэ вуэсстланнт, э оаз кӯдтэй туэресь пя̄лла. Ноэ пусьтэльт оаз роаммшэдэ, штэ ке̄һпьсэнне сӣнэнҍ пе̄сстэдэ. О̄ллма ев аллкэнч ӣнха оаррэ, ев аллка со̄н нюэссь соагэтҍ кӯннҍтэ. Пӯдтӭнҍ я цӣӆӆькэнҍ оадзкэ: »Мыйй тоннӭ ва̄лт энҍтэмь я мыйй шэ то̄нэсьт поагэ ва̄лльтэпь.« Я выйхэнҍ оадзэ моазэ ва̄рра е̄лле. Моайнас пугк.

Яковлев Мыдтҍре Ла̄зэр